एजेन्सी, असोज २० । स्पेनका प्रधानमन्त्री पेद्रो सान्चेजले समयअगावै आमनिर्वाचन घोषणा गरेका छन्। उनका अनुसार आगामी नोभेम्बर २९ मा निर्वाचन हुनेछ, जुन निर्धारित समयभन्दा करिब आठ महिना अगाडि हो।
संसदमा सरकारको आवाससम्बन्धी प्रस्ताव अस्वीकृत भएपछि सान्चेजले सोमबार निर्वाचनको घोषणा गरेका हुन्। उनको अल्पमत सरकारले भाडा नियन्त्रण, जबर्जस्ती निष्कासन रोक्ने तथा घरजग्गा क्षेत्रमा हुने सट्टेबाजी नियन्त्रण गर्ने उद्देश्यसहित ल्याएका दुई आपत्कालीन उपायलाई संसदले अस्वीकार गरेको थियो।
स्पेनमा पछिल्लो समय आवासको बढ्दो मूल्य र महँगो भाडाविरुद्ध देशका विभिन्न शहरमा प्रदर्शन हुँदै आएका छन्। विशेषगरी वृद्ध महिला मारिया डेल कार्मेन अबास्काललाई म्याड्रिडस्थित घरबाट हटाइएको घटनापछि आवास संकटविरुद्धको असन्तुष्टि थप चर्किएको छ। हजारौं प्रदर्शनकारीले सस्तो आवास, भाडा नियन्त्रण र भाडावालको अधिकार संरक्षणको माग गर्दै प्रदर्शन गरेका छन्।
सरकारले आवास संकट समाधान गर्न ल्याएको प्रस्तावमा भाडावाललाई थप सुरक्षा दिने, घरबाट निष्कासन रोक्ने र घरजग्गा क्षेत्रमा हुने सट्टेबाजी नियन्त्रण गर्ने व्यवस्था थियो। तर विपक्षी दलहरूको विरोधका कारण ती प्रस्ताव संसदबाट पारित हुन सकेनन्।
निर्वाचन घोषणा गर्दै प्रधानमन्त्री सान्चेजले संसदमा थप बलियो प्रगतिशील जनादेश आवश्यक रहेको बताएका छन्। उनले स्पेनका नागरिकलाई देशले कस्तो भविष्य रोज्ने भन्ने निर्णय गर्ने समय आएको बताएका छन्।
सान्चेज सन् २०१८ देखि स्पेनका प्रधानमन्त्री छन्। आगामी निर्वाचन उनको नेतृत्वमा रहेको समाजवादी पार्टीका लागि महत्वपूर्ण हुने देखिएको छ। विपक्षी पिपुल्स पार्टी (पीपी) र दक्षिणपन्थी भोक्सलगायत दलले सरकारमाथि दबाब बढाउँदै आएका छन्।
यसबीच आवास संकट निर्वाचनको प्रमुख मुद्दामध्ये एक बन्ने देखिएको छ। सान्चेजले आवाससम्बन्धी प्रस्तावलाई प्राथमिकतामा राख्दै आएका छन् भने विपक्षी दलहरूले थप घर निर्माण र कर कटौतीलाई आफ्नो एजेन्डाका रूपमा अघि सारेका छन्।
नोभेम्बर २९ मा हुने निर्वाचनले स्पेनको आगामी सरकारको राजनीतिक दिशा निर्धारण गर्नेछ।
प्रकाशित मिति: २०८३ आश्विन २०, मंगलवार ०८:५९
